انا هقول لأ .. ياترى انت هتقول أية ؟

ممكن نتكلم لحظة عن التعديلات الدستورية .. أستنى اوعى متكنش ناوى تشارك فى الاستفتاء يوم 19 مارس وتعبر عن رأيك وتبقى سلبى زى زمان ، مصر دلوقتى بقت حرة وانت كمان بقيت حر ، فأوعى تحرم مصر من صوتك الحر عشان هى تبقى حرة



نرجع تانى للاستفتاء على التعديلات الدستورية .. انا عارف انك فى الغالب حيران ومتلخبط ومش عارف تقول ( نعم ) ولا تقول ( لأ ) زى كتير من المصريين .. ناس بتقولك قول اة وناس تانية بتقولك قول لأ .. انا بقى مش هقولك تقول اة او تقول لأ انت حر ودى بلدك .. بس انا حابب أدردش معاك شوية



قبل كل شىء وقبل ما أقولك اى حاجة ، انت مش معايا فى الرأى ان الشعب المصرى قام بثورة شعبية عظمية ملهاش مثيل قبل كدة فى التاريخ ، انت مش معايا ان الحرية اللى بنتنفسها دلوقتى دفع ثمنها مئات من شهدائنا الابرار اللى ضحوا بحياتهم عشان بلدنا تبقى حرة وعشان انا وانت نبقى احرار فى بلدنا ، متفقين فى النقطة دى صح تمام



بس يعنى اية ثورة ؟ الثورة باختصار تعنى سقوط النظام برئيسه ( مبارك ) بحكومته ( نظيف وشفيق ) ببرلمانه( فتحى سرور و صفوت الشريف ) بدستوره ( العقد الفاسد اللى كان بيحكموك بيه ) .. وهو ده اللى عمله الشعب المصرى فى ثورته العظيمة لان مطلبه الاول والاخير كان اسقاط النظام .. مش انت هتفت معانا فى المظاهرات " الشعب يريد اسقاط النظام " انت نسيت ولا ايه ؟ .. يبقى ليه عاوزنا نرقع دستور ساقط وميت ونرجعه للحياة من جديد عشان يحكمنا ، تفتكر دة لمصلحة مين ! ومين اللى عاوز كدة ! .. ( انا هسيبها لضميرك ) .. وبعدين لو انت عندك فاكهة فاسدة بتعمل فيها اية .. مش بترميها فى صندوق الزبالة وبتجيب فاكهة جديدة مش دة اللى بيحصل .. الله طب عاوزنا نرقع ونعدل الدستور الفاسد والساقط ليه



ثورة يعنى هدم كل النظام القديم الفاسد ، ثورة يعنى بناء نظام جديد على مية بيضة ، وعشان نبنى النظام دة انا وانت مع بعض محتاجين بجد دستور جديد يعنى عقد جديد .. عارف دستور جديد يعنى اية

1. يعنى ضمان حرياتك وحقوقك الشخصية اول حاجة .. عشان محدش يضربك تانى على قفاك
2. يعنى رئيس منتخب خادم للشعب ( تقدر تحاسبه فى اى وقت ) .. فاكر مبارك
3. يعنى برلمان حقيقى قوى ممثل للشعب كله ( يوصل صوتك ويمثلك بجد ) .. فاكر فتحى وصفوت
4. يعنى دولة ديمقراطية مدنية يسود فيها مبدأ المواطنه
5. يعنى قضاء مصرى مستقل بجد .. عشان تعرف تاخد حقك بجد من الرئيس والغفير
6. يعنى اعلام مصرى حر بجد .. فاكر فضيحة التليفزيون المصرى وصحف الحكومة ايام الثورة وقبلها وحتى بعدها

والدستور القديم اللى عاوزنا نعدله ونرقعه ونرجعه للحياة تانى يعنى كل الحاجات اللى فاتت دى متبقاش موجود خالص ونرجع على قديمه تانى ، يعنى حقوقك وحرياتك الشخصية تبقى فى خطر ، يعنى هنجيب فرعون و ديكتاتور جديد ( أوى تنسى مبارك ! ) ، يعنى برلمان مش بيمثل الناس ومش بيعبرعن كل الشعب المصرى ، يعنى القضاء يفضل غير مستقل ، يعنى الاعلام المصرى يفضل مش حر ومش بيعبر عنك ، وهتلاقى تانى فى وشك يا حلو تامر امين واسامة سرايا .. لسة عاوز منافقين تانى .. ملحوظة المنافقين مش بيموتوا



تفتكر بعد كل التضحيات الكبيرة اللى دفعها الشعب المصرى وسنين الذل اللى عاشها والفقر اللى ذاقه ، ودم ولادنا اللى سال ايام الثورة ، كل دة ثمنه شوية تعديلات على دستور مبارك . بزمتك مش حرام !



على فكرة انا عارف ان فيه ناس اليومين دول بيخوفوك على البلد وبيقلولك عشان الاستقرار لازم تقول نعم للتعديلات الدستورية . بس مسألتش نفسك هما لية بيخوفوك ؟ عارف هما بيخوفوك لية ؟ أقولك انا عشان عاوزين يسلبوك أرادتك تانى ويجبروك تقول ( أة ) غصب عنك ومن غير متقتنع .. فيقولولك لو قولت لأ هتخش النار وتبقى ضد الاسلام ، ولو قولت لأ هتبقى البلد فوضى ، ولو قولت لأ هنواجه المجهول ، ولو قولت لأ العكسر هيحكمومنا .. طب هما لية بيخوفونا



انا عن نفسى احب اطمنك واقولك قول رايك بكل حريتك من غير ما تخاف ، خلاص زمن الخوف انتهى ، عارف ليه تطمن ؟ لان البلد فيها حكومة بديرها وفيها رئيس وزراء خادم للشعب أسمه عصام شرف اقسم على الحفاظ على الثورة وقبل الثورة أقسم على الحفاظ على البلد وعلى امن المواطن وعلى اقتصاد البلد فالامور فى يد اناس امناء فأطمئن ، الامن رجع وهيرجع اكتر واكتر والاقتصاد هيتعافى وهترجع شغلك من جديد ولو كنت طالب هترجع جامعتك .. ومفيش فوضى ولا حاجة





وأهم حاجة ان كل دة ملوش علاقة انك تقول أة أو تقول لأ .. بس مادام البلد بقت مستقرة الحمد لله تفتكر لية بيخوفوك وبيجبروك تقول ( أة ) شوف انت بقى ؟ فاكر برضو الناس اللى كانوا بيخوفوك ايام الثورة نفسها عشان منكملش ونرضى بقليلنا .. فاكر ولا نسيت .



نيجى بقى لاهم نقطة فى الموضوع وهى اننا لو قولنا ( لأ ) هيحصل اية ؟ تسمحلى اقولك لو انت مش عارف ؟ هيحصل الاتى :-

1. الاعلان رسمياً عن سقوط دستور 71 القديم ( دستور مبارك ) بإرادة الشعب المصرى الحر
2. الاعلان عن اعلان دستورى مؤقت يحكم البلاد لفترة انتقالية قصيرة لحين اصدار الدستور الجديد
3. تشكيل جمعية تأسيسية لكتابة دستور جديد للبلاد
4. اجراء الانتخابات الرئاسية والبرلمانية بعد اقرار الدستور الجديد من الشعب ، يعنى انتخاب رئيس وبرلمان شرعيين طبقاً للدستور الجديد اللى بنحلم بيه . وبكدة تبقى الثورة انتصرت وحققت اهدافها اللى بنحلم بيها من عشرات السنين

بذمتك فى احلى من كدة فى الدنيا ، هو دة اللى هيحصل والله ، لو قولت ( لأ ) ، ومفيش حكم عسكر ولا حاجة لان دى ثورة شعبية حقيقية والقوات المسلحة مجرد حامى لها ، ودة مش رأيى لوحدى دة رأى كل الفقهاء الدستوريين اللى فى البلد ومنهم د/ يحيى الجمل نائب رئيس الوزراء .



معنى كدة ان رأيك مهم فى تحديد مصير مستقبل مصر

معنى كدة ان رأيك مهم لانه هيقطع الطريق على الناس اللى عاوزه تضرب الثورة فى نص الطريق وتسرقها او تقتلها قبل ما تكمل مسيرتها وتحقق اهدافها نحو تحول ديمقراطى حقيقى يدخل مصر الى عصر الحرية والعدالة والكرامة الانسانية



انا هقول لأ للتعديلات عشان انا عايز دستور جديد

انا هقول لأ للتعديلات عشان مسمحش لحد انه يسرق ثورة الشعب المصرى العظيم

انا هقول لأ للتعديلات عشان دم الشهيد = دستور جديد

انا هقول لأ للتعديلات عشان الحق والعدل والحرية والكرامة الانسانية